- జూలై 7, 2025 నుంచి జెమిని, ఫోన్, మెసేజెస్, వాట్సాప్ వంటి యాప్స్తో పనిచేస్తుందని గూగుల్ యూజర్లకు చెబుతోంది.
- జెమిని యాప్స్ యాక్టివిటీ ఆన్ ఉన్నా, ఆఫ్ ఉన్నా ఇది జరుగుతుందని గూగుల్ పేర్కొనడం ప్రైవసీ ఆందోళనలు పెంచుతోంది.
గూగుల్ తన ఏఐ అసిస్టెంట్ జెమినికి సంబంధించి ఒక ముఖ్యమైన మార్పును ప్రకటించింది. జూలై 7, 2025 నుంచి జెమిని, ఆండ్రాయిడ్ ఫోన్లలోని ఫోన్, మెసేజెస్, వాట్సాప్ వంటి యాప్స్తో పనిచేయగలదని, అది మీ జెమిని యాప్స్ యాక్టివిటీ ఆన్లో ఉన్నా, ఆఫ్లో ఉన్నా సరే ఈ ఫీచర్ అందుబాటులో ఉంటుందని గూగుల్ యూజర్లకు ఈమెయిల్స్ పంపుతోంది. అయితే, ఈ ప్రకటన ప్రైవసీపై తీవ్ర ఆందోళనలను పెంచుతోంది.
స్పష్టత కొరవడిన గూగుల్ ప్రకటన
గూగుల్ పంపిన ఈమెయిల్లోని వాక్యాలు చాలా అస్పష్టంగా ఉన్నాయని యూజర్లు చెబుతున్నారు. జెమిని యాప్స్ యాక్టివిటీని ఆఫ్ చేసినప్పటికీ, జెమిని ఈ యాప్స్ను యాక్సెస్ చేస్తుందా లేదా అనే దానిపై స్పష్టత లేదు. అంతేకాదు, ఈ ఫీచర్లను వద్దనుకుంటే “యాప్ సెట్టింగ్స్”లో డిసేబుల్ చేసుకోవచ్చని ఈమెయిల్ చెప్పింది. కానీ, అది ఎలా చేయాలో, ఆ ఆప్షన్ ఎక్కడ ఉంటుందో వివరంగా చెప్పలేదు. ఈ మార్పులకు సంబంధించి గూగుల్ మార్గదర్శకాలు చాలా అస్పష్టంగా ఉన్నాయి. “ఈ ఫీచర్లను ఉపయోగించడం మీకు ఇష్టం లేకపోతే, మీరు వాటిని యాప్స్ సెట్టింగ్స్ పేజీలో ఆఫ్ చేయవచ్చు” అని మాత్రమే పేర్కొంది. ఆ ఆప్షన్ ఎక్కడ దొరుకుతుందో, సరిగ్గా ఏమి డిసేబుల్ అవుతుందో ఎలాంటి వివరాలు లేవు. జెమిని యాప్స్ యాక్టివిటీ ఆన్ లేదా ఆఫ్ ఉన్నా ఈ మార్పులు వర్తిస్తాయని ఈమెయిల్ చెప్పినప్పుడు, ఇది మరింత గందరగోళాన్ని సృష్టించింది.
ప్రైవసీ ఆందోళనలు, గూగుల్ స్పందన కోసం ఎదురుచూపు
ఈమెయిల్లో ఇచ్చిన లింక్ జెమిని యాప్స్ ప్రైవసీ హబ్కు దారి తీసినా, అక్కడ కూడా ఈ మార్పుల గురించి పెద్దగా స్పష్టత లేదు. “మీకు ఉపయోగపడటం” అంటే ఆచరణలో ఏమిటి? జెమిని డిఫాల్ట్గా మెసేజ్లను చదవడం, పంపడం, కాల్ లాగ్లను యాక్సెస్ చేయడం లేదా వాట్సాప్ వంటి థర్డ్-పార్టీ యాప్లతో సంభాషించడం వంటివి చేస్తుందా? యూజర్లు ఈ అనుసంధానాలను ఆప్ట్ అవుట్ చేసినా ఇది జరుగుతుందా? అనే ప్రశ్నలు తలెత్తుతున్నాయి. ఈ మార్పులు అమలులోకి రావడానికి రెండు వారాల కన్నా తక్కువ సమయం ఉంది. ఈ నేపథ్యంలో, స్పష్టమైన సమాధానాల కోసం గూగుల్ను సంప్రదించినట్లు పలు నివేదికలు చెబుతున్నాయి. ఎక్స్లో టిప్స్టర్ CID తో పాటు ఇతర యూజర్లు ఈ ఈమెయిల్ను హైలైట్ చేశారు. అయితే, చాలామంది యూజర్లకు ఇంకా ఈ ఈమెయిల్ అందలేదు.
