సినీ హీరో అల్లు అర్జున్ను హైదరాబాద్ చిక్కడపల్లి పోలీసులు అరెస్ట్ చేశారు. ఉదయం ఆయన ఇంటికి వెళ్లి అదుపులోకి తీసుకున్నారు. ప్రస్తుతం చిక్కడపల్లి పోలీస్ స్టేషన్లో విచారణ కొనసాగుతోంది, మరియు వైద్య పరీక్షల కోసం అల్లు అర్జున్ను ఉస్మానియా ఆస్పత్రికి తరలించనున్నారు. అనంతరం కోర్టులో హాజరు పరిచే అవకాశముందని తెలుస్తోంది. అల్లు అర్జున్పై బీఎన్ఎస్ 118(1), బీఎన్ఎస్ 105, రెడ్ విత్ 3/5 బీఎన్ఎస్ సెక్షన్ల కింద కేసు నమోదు చేశారు. 105 సెక్షన్ నాన్ బెయిలబుల్ కేసు కావడంతో 5 నుంచి 10 ఏళ్ల శిక్ష పడే అవకాశం ఉంది. బీఎన్ఎస్ 118(1) కింద ఏడాది నుంచి 10 సంవత్సరాల శిక్ష పడే అవకాశం ఉంది. ఈ సందర్భంగా అల్లు అర్జున్ తరఫు న్యాయవాది హైకోర్టును ఆశ్రయించారు, బుధవారమే పిటిషన్ వేశామని, ఇంకా విచారణ జరగలేదని పేర్కొన్నారు. అత్యవసరంగా పిటిషన్ విచారించాలని న్యాయవాది కోరారు. ఈ ఘటన సంధ్య థియేటర్ వద్ద జరిగిన తొక్కిసలాటకు సంబంధించి, అక్కడ సెక్యూరిటీ సిబ్బంది మరియు థియేటర్ యజమానిని కూడా పోలీసులు అరెస్ట్ చేశారు.
