యోగాతో శారీరక, మానసిక ఆరోగ్యం: విశాఖలో సీఎం చంద్రబాబు కీలక ప్రసంగం!

• విశాఖలో నిర్వహించిన యోగాంధ్ర కార్యక్రమంలో ఏపీ సీఎం చంద్రబాబు పాల్గొన్నారు.
• యోగాతో క్రమశిక్షణ, ఏకాగ్రత పెరుగుతాయని సీఎం స్పష్టం చేశారు.

శారీరక, మానసిక ఆరోగ్యానికి యోగా ఎంతగానో దోహదపడుతుందని ఆంధ్రప్రదేశ్ ముఖ్యమంత్రి చంద్రబాబు నాయుడు అన్నారు. విశాఖపట్నంలో జరిగిన యోగాంధ్ర కార్యక్రమంలో ఆయన ప్రసంగించారు. యోగా దినోత్సవం సందర్భంగా విశాఖలో ఓ రికార్డు సృష్టించామని, 1.44 లక్షల మంది యోగా శిక్షకులు ఈ కార్యక్రమంలో తమ పేర్లను నమోదు చేసుకున్నారని సీఎం తెలిపారు. నిన్న 22 వేల మంది గిరిజన విద్యార్థులు సూర్య నమస్కారాలతో గిన్నిస్ రికార్డు సాధించడం గొప్ప విషయమని కొనియాడారు. ప్రతిరోజు గంటసేపు యోగా చేయడం వల్ల ఎంతో మంచి ఫలితాలు ఉంటాయని ఆయన సూచించారు.

యోగా – ప్రపంచ ఉద్యమం

యోగా కేవలం వ్యాయామం కాదని, క్రమశిక్షణ, ఏకాగ్రతను పెంచుతుందని చంద్రబాబు వివరించారు. 130 దేశాల్లో యోగా దినోత్సవాన్ని నిర్వహించుకుంటున్నారని, యోగాను అన్ని క్రీడల్లోనూ భాగం చేయాల్సిన అవసరం ఉందని ఆయన అన్నారు. స్వర్ణాంధ్ర 2047 లక్ష్య సాధనలో యోగాకు భాగస్వామ్యం కల్పిస్తామని తెలిపారు. ప్రధానమంత్రి మోదీ యోగాను ప్రపంచ ఆరోగ్య ఉద్యమంగా మార్చారని, ఆయన స్ఫూర్తితోనే ఏపీలో నెల రోజుల పాటు యోగాంధ్ర కార్యక్రమాన్ని నిర్వహించామని సీఎం వెల్లడించారు. వికసిత్ భారత్‌లో భాగంగా రాష్ట్రాన్ని ఆరోగ్యకరమైన, సంపన్నమైన, సంతోషకరమైన ఆంధ్రప్రదేశ్‌గా మారుద్దామని ఆయన పిలుపునిచ్చారు. శరీరం, మనస్సు, ఆత్మల కలయికే యోగా అని, దీనివల్ల రోగనిరోధక శక్తి, ఆత్మవిశ్వాసం పెరుగుతాయని చంద్రబాబు చెప్పారు. యోగా ఇప్పుడు ప్రజా ఉద్యమంగా మారి జీవనశైలిలో భాగమైందని పేర్కొంటూ, రోజూ గంట పాటు యోగా చేయాలని ప్రజలను కోరారు. ఆసియా క్రీడలు, కామన్వెల్త్, ఒలింపిక్స్‌లో యోగాను చేర్చాలని, వన్ ఎర్త్-వన్ హెల్త్ సాధనకు అందరం కృషి చేద్దామని అన్నారు. యోగాంధ్ర కార్యక్రమం ఒక ట్రెండ్ సెట్టర్‌గా మారిందని, ఇందులో భాగంగా 1.44 లక్షల మందికి శిక్షణ ఇచ్చామని, 1.40 లక్షలకు పైగా ప్రాంతాల్లో 2.17 కోట్ల మంది యోగాలో పాల్గొన్నారని తెలిపారు. విశాఖలో నిర్వహించిన యోగాంధ్రలో 3 లక్షల మందికిపైగా పాల్గొనగా, 1.70 కోట్ల మందికి ధ్రువపత్రాలు జారీ చేశామని చంద్రబాబు వివరించారు.