ఆంధ్రప్రదేశ్ ప్రభుత్వం పింఛన్ పొందుతున్న వృద్ధులు, దివ్యాంగుల కోసం కీలక నిర్ణయం తీసుకుంది. ఇప్పటి వరకూ వారూ ఇతరుల మాదిరిగానే నెల ప్రారంభమైన తర్వాతే రేషన్ తీసుకునేవారు. కానీ జులై నెల నుంచే వారికి రేషన్ సరఫరా ఐదు రోజుల ముందే ప్రారంభించనున్నారు. దీంతో వృద్ధులు, దివ్యాంగులకు ప్రత్యేక ఏర్పాట్లు జరిగే అవకాశం ఉంది. ఈ నెల 26వ తేదీ నుంచే రేషన్ పంపిణీ ప్రారంభమవుతుందని అధికారులు తెలిపారు. రాష్ట్ర వ్యాప్తంగా సుమారు 65 లక్షల మంది పింఛన్ దారులు ఉన్నట్టు సమాచారం. వారిలో 13 నుంచి 14 లక్షల మంది వృద్ధులు, దివ్యాంగులుగా గుర్తించారు. వారికి వారం ముందు నుంచే రేషన్ అందిస్తామని ప్రభుత్వ వర్గాలు వెల్లడించాయి.
ఈ కొత్త విధానం వల్ల డీలర్ల మీద ఆధారపడాల్సిన అవసరం లేకుండా, సచివాలయాల వద్ద ఏర్పాటు చేసిన పంపిణీ కేంద్రాల నుంచే నేరుగా సరుకులు అందించనున్నారు. ఇది ప్రభుత్వ సేవలను ప్రజలకు మరింత సమర్థంగా అందించేందుకు తీసుకున్న అడుగుగా అధికారులు వివరించారు. అలాగే, బియ్యం సరఫరా జరిగే కేంద్రాల వద్ద తహసీల్దార్లు నేరుగా పర్యవేక్షణ చేపట్టాలని ఆదేశాలిచ్చారు.
