నెట్టింట్లో ఏ వెబ్ సైట్ తలుపు తెరవాలన్నా బ్రౌజర్ ని ఓపెన్ చేయాల్సిందే. బ్రౌజర్ అంటే మనకి తెలిసింది క్రోమ్.. సెర్చింజన్ అంటే గూగుల్. కొద్దిమంది మైక్రోసాప్ట్ బింగ్, ఇంటర్నెట్ ఎక్స్ ప్లోరర్ కూడా తెలుసు. ఎక్కువగా వీటికే అందరుం ప్రిఫరెన్స్ ఇస్తుంటాం. ఈ క్రమంలో క్రోమ్ బ్రౌజర్ తో గూగుల్ గుట్టు చప్పుడు కాకుండా మన వెబ్ విహారాన్ని నిత్యం ట్రాక్ చేస్తుంది. మనం ఏం వెతుకుతున్నామో ట్రాక్ చేస్తుంది. కుకీస్ ని కట్టుదిట్టంగా బ్రౌజర్ లో కూర్చోబెట్టేసి మన గుట్టంతా వెబ్ సైట్లకు రట్టు చేస్తుంది. అందుకే నెటిజన్ ప్రైవసీని కాపాడుకోవడం విధిగా అలవర్చుకోవాలి. ఈ నేపథ్యంలో రోజు వారీ బ్రౌజింగ్ అవసరాలకు క్రోమ్, గూగుల్ తప్ప మరో ప్రత్యామ్నాయం లేదా? ఉంది.. ప్రైవసీని కాపాడుతూ, కొత్త హంగులతో బ్రౌజింగ్ చేయొచ్చు. వీటిని ఓ సారి ట్రై చేయండి..
DuckDuckGo
వ్యక్తిగత సమాచారం ఎవరికీ చిక్కుండా ప్రైవేటుగా బ్రౌజింగ్ చేసేందుకు చక్కని వేదిక. సెర్చింజన్ గానే కాకుండా బ్రౌజర్ లా పని చేస్తుంది. ధర్డ్ పార్టీ ట్రాకర్స్ అన్నింటిని బ్రౌజర్ బ్లాక్ చేస్తుంది. దీంట్లో మీరు ఏ టాపిక్ ని వెతికినా ప్రైవేటుగానే ఉంటుంది. ఏ వెబ్ సైట్ ని ఓపెన్ చేసినా.. కూకీస్ ‘పాప్ అప్స్’ కనిపించవు. ఈమెయిల్ ట్రాకర్స్ ని కూడా బ్లాక్ చేస్తుంది. యూట్యూబ్ వీడియోలను కూడా ఎలాంటి టార్గెట్ యాడ్స్ లేకుండా చూడొచ్చు. సెర్చింగ్ చేసే క్రమంలో సెర్చ్ రిజల్ట్స్ ని భిన్నంగా అందిస్తుంది. ఫోన్, ట్యాబ్, సిస్టం.. అన్నింటిలోనూ సింక్ చేసుకుని వాడుకోవచ్చు. దీన్ని వాడేందుకు https://duckduckgo.com సైట్ లోకి వెళ్లండి.
Ecosia
పర్యావరణ హితంగా నెట్టింట్లో విహరిద్దాం అనుకుంటే ఇదో చక్కని సెర్చింజన్. దీన్ని వాడడం ద్వారా ప్రపంచ వ్యాప్తంగా చెట్లు పెంచే క్రతువులో మీరు కూడా భాగస్వాములు కావచ్చు. ఈ వేదిక ద్వారా ఇప్పటికే 35 దేశాల్లో 213 మిలియన్లు పైబడే చెట్లను నాటారు. యూజర్ ప్రైవసీ కాపాడుతూనే వెబ్ విహారానికి సాయపడుతుంది. దీన్ని బ్రౌజర్ మాదిరిగా సిస్టమ్ లో ఇన్స్ స్టాల్ చేసుకుని క్రోమ్ కి ప్రత్యామ్నాయంగా వాడుకోవచ్చు. ఈ సర్వీసుని వాడేందుకు https://www.ecosia.org వెబ్ సర్వీసుని ఓపెన్ చేయండి.
Brave Search
యూజర్ ప్రైవసీని కాపాడడమే ధ్యేయంగా ఇది పని చేస్తుంది. వ్యక్తిగత సమాచారాన్ని ఏ థర్డ్ పార్టీ వెబ్ సర్వీసుకి చిక్కకుండా బ్రేవ్ లో సెర్చ్ చేయొచ్చు. ‘ఏఐ’ సపోర్ట్ తో ప్రత్యేకంగా సెర్చ్ రిజల్ట్స్ ని పొందొచ్చు. ఏఐ జనరేట్ కంటెంట్ ని, సెర్చింజన్ రిజల్ట్స్ ని ఒకేసారి పోల్చి చూసేందుకు దీంట్లో వీలుంది. దీంతో వెతుకులాటలో పక్కా సమాచారాన్ని పొందే వీలుంది. బ్రౌజర్ లా సిస్టంలో ఇన్ స్టాల్ చేసుకుని కూడా వాడొచ్చు. ప్రయత్నిద్దాం అనుకుంటే… https://search.brave.com సైట్ లోకి వెళ్లండి.
Startpage
గూగుల్ సెర్చ్ కి అలవాటు పడిపోయాం. ఇప్పుడెలా వేరే దాంట్లో బ్రౌజ్ చేయడం? అనుకుంటే.. స్టార్ట్ పేజ్ సెర్చింజన్ మీకు సరైన ఎంపిక. ఇంచుమించు గూగుల్ సెర్చింజన్ లానే కనిపిస్తుంది. కానీ, యూజర్ల ప్రైవసీ విషయంలో మాత్రం పక్కా స్ట్రిక్ట్. ఎలాంటి ట్రాకింగ్ విధానాల్ని యాక్సెప్ట్ చేయదు. The Internet without tracking… అనే నినాదంతో పని చేస్తుంది. మొబైల్ యాప్ లానూ ఫోన్ లో వాడొచ్చు. డౌన్ లోడ్, ఇతర వివరాలకు www.startpage.com సైట్ ని చూడండి.
Perplexity
నేటి తరం నెటిజన్లకు సరిపడే సెర్చింజన్ ఇది. ‘ఏఐ’ సపోర్ట్ తో కావాల్సిన సెర్చి రిజల్ట్స్ ని అందిస్తుంది. దీంతో తక్కువ సమయంలోనే కావాల్సిన మొత్తం సమాచారాన్ని సేకరించొచ్చు. మీరు అడిగిన సమాచారానికి తగిన ఫాలోఅప్స్ ని కూడా సేకరిస్తుంది. టెక్స్ట్, ఇమేజ్ లను విభాగాలుగా అందిస్తుంది. ట్రై చేస్తే కచ్చితంగా బుక్ మార్క్ చేసుకోవాల్సిందే. కావాలంటే www.perplexity.ai వెబ్ సైట్ ని చూడండి.
