- గచ్చిబౌలిలో 50 అంతస్తుల యూనిటీ మాల్ నిర్మాణానికి ప్రభుత్వం సన్నాహాలు.
- ఇది దేశవ్యాప్తంగా చేనేత, హస్తకళల ఉత్పత్తులకు ఒకే వేదిక కానుంది.
- ప్రాజెక్టును వేగవంతం చేయాలని అధికారులను సీఎం రేవంత్ రెడ్డి ఆదేశించారు.
హైదరాబాద్లోని గచ్చిబౌలిలో 5.16 ఎకరాల స్థలంలో ఒక భారీ నిర్మాణం మొదలుకానుంది. 50 అంతస్తులతో యూనిటీ మాల్ పేరిట ఈ ప్రాజెక్టుకు తెలంగాణ ప్రభుత్వం సన్నాహాలు చేస్తుంది. సుమారు రూ.1,500 కోట్లు ఖర్చుతో ఈ భవనం నిర్మాణానికి ప్రణాళికలు రూపొందించారు. ఇది ప్రభుత్వ-ప్రైవేటు భాగస్వామ్యంతో(పీపీపీ) నిర్మిస్తారు. ఈ ప్రాజెక్టుతో హైదరాబాద్ ఒక ప్రముఖ వాణిజ్య కేంద్రంగా మరింత బలోపేతం అవుతుందని ప్రభుత్వం భావిస్తోంది.
ఈ భవనంలో 5 బేస్మెంట్లు పార్కింగ్ కోసం ఉంటాయి. 6 అంతస్తులను చేనేత, హస్తకళల ఉత్పత్తుల ప్రదర్శన కోసం ప్రత్యేకంగా కేటాయించారు. మిగిలిన 39 అంతస్తులను కార్యాలయాలు, వాణిజ్య సముదాయాలకు వినియోగిస్తారు. భారతదేశ సంస్కృతి, కళలను ఒకే వేదికపైకి తీసుకురావడమే ఈ యూనిటీ మాల్ ఉద్దేశం. కేంద్ర ప్రభుత్వ ‘ఒక జిల్లా- ఒక ఉత్పత్తి(ODOP)’ పథకంలో భాగంగా దేశవ్యాప్తంగా ఇలాంటి మాల్స్ నిర్మిస్తున్నారు. ఈ మాల్ ద్వారా స్థానిక కళాకారులు, చేనేత కార్మికులు తమ ఉత్పత్తులకు జాతీయ, అంతర్జాతీయ స్థాయిలో ప్రచారం చేసుకునే అవకాశం లభిస్తుంది. ఈ ప్రాజెక్టుకు సంబంధించి సవివర ప్రాజెక్టు నివేదిక(డీపీఆర్)ను కేంద్ర ప్రభుత్వం ఇప్పటికే ఆమోదించింది. నిర్మాణ పనులను వేగవంతం చేయాలని ఇటీవల జరిగిన సమావేశంలో ముఖ్యమంత్రి రేవంత్రెడ్డి అధికారులను ఆదేశించారు. 2027 నాటికి ఈ బహుళ అంతస్తుల భవనం సిద్ధం చేయాలని సీఎం గడువు విధించారు.
