- ‘బ్రీచ్ ఫోరమ్స్’లో ప్రత్యక్షమైన 17.5 మిలియన్ల ఇన్స్టాగ్రామ్ యూజర్ల వ్యక్తిగత సమాచారం
- ‘పాస్వర్డ్ రీసెట్ అటాక్’ పేరుతో హ్యాకర్ల కొత్త ఎత్తుగడ.. అధికారిక మెయిల్స్ లాగే భ్రమింపజేస్తున్న కేటుగాళ్లు
- ఖాతా భద్రత కోసం టూ ఫ్యాక్టర్ అథెంటికేషన్ (2FA) తక్షణమే ఆన్ చేసుకోవాలని నిపుణుల హెచ్చరిక
మీరు వినోదం కోసమో, కంటెంట్ క్రియేషన్ కోసమో ఇన్స్టాగ్రామ్ వాడుతున్నారా? అయితే ఈ వార్త మీ కోసమే. ప్రపంచవ్యాప్తంగా దాదాపు 1.75 కోట్ల మంది ఇన్స్టాగ్రామ్ ఖాతాల డేటా లీక్ అవ్వడం ఇప్పుడు సోషల్ మీడియాలో కలకలం సృష్టిస్తోంది. ఈ డేటాను అడ్డం పెట్టుకుని సైబర్ నేరగాళ్లు మీ అకౌంట్ను హ్యాక్ చేయడానికి సరికొత్త ప్లాన్ వేశారు. మీ ప్రమేయం లేకుండానే మీకు పాస్వర్డ్ మార్చుకోమని మెయిల్స్ వస్తున్నాయంటే.. మీరు హ్యాకర్ల టార్గెట్ లో ఉన్నట్టే లెక్క! (Instagram Data Leak 17.5 Million Accounts Password Reset Attack)
“మీరు రిక్వెస్ట్ చేయకుండానే పాస్వర్డ్ రీసెట్ లింక్ వచ్చిందా? అయితే ఆ లింక్ మీ అకౌంట్కు తలుపులు తీసే తాళం కాదు.. హ్యాకర్లు వేసిన వల!”
అసలు ఈ ‘పాస్వర్డ్ రీసెట్ అటాక్’ ఏంటి?
హ్యాకర్లు నేరుగా మీ పాస్వర్డ్ మార్చడానికి ప్రయత్నించరు. బదులుగా, ఇన్స్టాగ్రామ్ సిస్టమ్ ద్వారానే మీ ఖాతాకు పాస్వర్డ్ రీసెట్ రిక్వెస్ట్ పంపిస్తారు. ఆ వచ్చే ఇమెయిల్ లేదా నోటిఫికేషన్ చూడటానికి ఇన్స్టాగ్రామ్ నుంచే వచ్చినట్లుగా ఉండటంతో యూజర్లు భయపడి ఆ లింక్పై క్లిక్ చేస్తున్నారు. అక్కడే హ్యాకర్లు తమ పని పూర్తి చేస్తారు. మీరు స్వయంగా మార్చాలని అనుకోనప్పుడు వచ్చే ఇలాంటి మెయిల్స్ ను విస్మరించడమే అత్యుత్తమ మార్గం. మీ అకౌంట్ సేఫ్ గా ఉండాలంటే వెంటనే సెట్టింగ్స్ లోకి వెళ్లి ‘టూ ఫ్యాక్టర్ అథెంటికేషన్’ ఆన్ చేసుకోండి. అప్పుడు హ్యాకర్లకు మీ పాస్వర్డ్ తెలిసినా, మీ ఫోన్ కి వచ్చే ఓటీపీ లేదా సెక్యూరిటీ కోడ్ లేకుండా లోపలికి రాలేరు.
మీకు కూడా ఇటీవల ఇలాంటి అనుమానాస్పద ఇమెయిల్స్ ఏవైనా వచ్చాయా? సోషల్ మీడియా అకౌంట్స్ భద్రత కోసం మీరు ఎలాంటి జాగ్రత్తలు తీసుకుంటారు? కామెంట్ చేయండి.
