- పాత్ర ఏదైనా అందులో ఒదిగిపోగల కోట శ్రీనివాసరావు.. ముఖ్యంగా ‘అహ నా పెళ్ళంట!’ పిసినారి లక్ష్మీపతిగా ఆయన నటన అద్భుతం.
- రావు గోపాలరావు చేయాల్సిన పాత్రను కోట ఎందుకు చేశారు? నిర్మాత రామ నాయుడును దర్శకుడు జంధ్యాల ఎలా ఒప్పించారు?
పాత్ర ఏదైనా అందులో ఇమిడిపోగల అతికొద్ది మంది నటుల్లో కోట శ్రీనివాసరావు ఒకరు. క్యారెక్టర్ ఆర్టిస్టుగా, విలన్గా, హాస్యనటుడిగా ఆయన ఎన్నో విభిన్న పాత్రలు పోషించారు. ఆయన నటించిన కొన్ని పాత్రలు చూస్తే, కోట శ్రీనివాసరావు తప్ప మరొకరు ఆ పాత్రలను చేయలేరేమో అనిపిస్తుంది. అలాంటి పాత్రల్లో ‘అహ నా పెళ్ళంట!’ సినిమాలోని పిసినారి లక్ష్మీపతి పాత్ర ఒకటి. జంధ్యాల దర్శకత్వం వహించిన ఈ సినిమాలో పిసినారి పాత్రలో కోట శ్రీనివాసరావు అద్భుతంగా నటించారు. బ్రహ్మానందంతో కలిసి ఆయన పండించిన ‘అరగుండు’ కామెడీ ఇప్పటికీ నవ్వులు పూయిస్తుంది.
లక్ష్మీపతి పాత్ర కోసం మొదట రావు గోపాలరావుని అనుకున్నారు!
నిజానికి ‘అహ నా పెళ్ళంట!’ లోని లక్ష్మీపతి పాత్ర కోసం మొదట రావు గోపాలరావును అనుకున్నారట. అయితే, ఆ సమయంలో కోట శ్రీనివాసరావు నటించిన ‘మండలాధీశుడు’ సినిమా విడుదలైంది. ఆ సినిమాలో ఆయన నటన చూసిన జంధ్యాల, లక్ష్మీపతి పాత్రను కోట శ్రీనివాసరావుతోనే చేయించాలని పట్టుబట్టారు. మొదట్లో నిర్మాత డి. రామానాయుడు ఒప్పుకోలేదట. కానీ, జంధ్యాల పట్టుబట్టి ఆయన్ని ఒప్పించారు.
ఆనాటి విశేషాలను కోట శ్రీనివాసరావు ఒక సందర్భంలో ఇలా పంచుకున్నారు: “ఒకరోజు నేను చెన్నై వెళ్లడానికి ఎయిర్పోర్ట్కు వచ్చా. అప్పటికే రామానాయుడుగారు అక్కడ కూర్చుని ఉన్నారు. అప్పట్లో నాలాంటి నటుడు ఆయనకు ఎదురుగా కూర్చుని మాట్లాడటం చాలా గొప్ప విషయం. నేను వెళితే.. ‘ఇక్కడికి రావయ్యా! నీతో ఒక విషయం చెప్పాలి’ అన్నారు. ‘ఏంటి సర్?’ అని అడిగాను. ‘జంధ్యాలతో ఒక సినిమా ప్లాన్ చేశాను. ఇవాళే ఫైనలైజ్ అయింది. ఈ సినిమాలో ఒక క్యారెక్టర్ ఉంది. అది పండితే సినిమా చాలా బాగా ఆడుతుంది. లేకపోతే యావరేజ్గా ఆడుతుంది. ఆ పాత్ర గురించి నాకూ జంధ్యాలకు 20 రోజులుగా చర్చ జరుగుతోంది. నేను రావు గోపాలరావుతో వేయిద్దామనుకున్నా. కానీ, కోట శ్రీనివాసరావుతోనే ఆ పాత్ర వేయిస్తానని జంధ్యాల పట్టుబట్టారు. నేను సరే అన్నా. 20 రోజుల పాటు నీ డేట్స్ కావాలి’ అని అడిగారు. ‘తప్పకుండా సర్’ అన్నా. ఆ తర్వాత ఈ సినిమా విడుదలై ఘన విజయం సాధించింది. నా పాత్రకు మంచి పేరు వచ్చింది.” అని కోట శ్రీనివాసరావు ఆ రోజులను గుర్తు చేసుకున్నారు
