- రాజమహేంద్రవరం అంటే గోదావరి తీరమే గుర్తుకొస్తుందని ఏపీ డిప్యూటీ సీఎం పవన్ కళ్యాణ్ అన్నారు.
- అఖండ గోదావరి ప్రాజెక్టు శంకుస్థాపన సందర్భంగా ఆయన ఈ వ్యాఖ్యలు చేశారు.
రాజమహేంద్రవరం అంటే గోదావరి తీరమే గుర్తుకొస్తుందని ఆంధ్రప్రదేశ్ ఉప ముఖ్యమంత్రి పవన్ కళ్యాణ్ అన్నారు. అఖండ గోదావరి ప్రాజెక్టుకు శంకుస్థాపన చేసిన తర్వాత ఆయన మాట్లాడారు. నదుల తీరం వెంబడి నాగరికత, భాష లాంటివన్నీ అభివృద్ధి చెందుతాయని పవన్ కళ్యాణ్ పేర్కొన్నారు. ఆంధ్రుల అన్నపూర్ణగా పేరు పొందిన డొక్కా సీతమ్మకు జన్మనిచ్చిన నేల రాజమహేంద్రవరం అని గుర్తుచేశారు.
పర్యాటక రంగం, ఉపాధి అవకాశాలు
“ఆదికవి నన్నయ్యతో పాటు ఎంతో మంది కళాకారులకు జన్మనిచ్చిన నేల ఇది. చాలా కాలంగా ఉన్న కలను నిజం చేసే దిశగా అడుగులు వేయడం ఆనందంగా ఉంది” అని పవన్ కళ్యాణ్ అన్నారు. పర్యాటక రంగం ద్వారా యువతకు ఎక్కువ ఉపాధి అవకాశాలు లభిస్తాయని ఆయన చెప్పారు. ఈ ప్రాజెక్టు పూర్తయితే ఏటా 4 లక్షల మంది పర్యాటకులు పెరిగే అవకాశం ఉందని అంచనా వేశారు. శక్తివంతమైన నాయకులు, బలమైన ప్రభుత్వం ఉంటే అభివృద్ధి మరింత వేగంగా జరుగుతుందని పవన్ కళ్యాణ్ అభిప్రాయపడ్డారు.
విశాఖ స్టీల్ ప్లాంట్, కేంద్ర మంత్రికి ధన్యవాదాలు
విశాఖ స్టీల్ ప్లాంట్ ప్రైవేటీకరణ కాకుండా ఆపగలిగామంటే, దానికి కేంద్ర మంత్రి గజేంద్ర సింగ్ షెకావత్ కారణమని పవన్ కళ్యాణ్ కొనియాడారు. ఆంధ్రప్రదేశ్ అభివృద్ధి కోసం షెకావత్ ప్రత్యేకంగా కృషి చేస్తున్నారని తెలిపారు. రాష్ట్రవ్యాప్తంగా ఉన్న పర్యాటక కేంద్రాలకు మళ్ళీ పూర్వ వైభవం తీసుకురావాలని కోరారు. రాజస్థాన్లోని వీరులు పుట్టిన నేల నుంచి వచ్చిన షెకావత్, ఆంధ్రుల పౌరుషం ఉన్న ఈ నేల స్వభావాన్ని అర్థం చేసుకుంటున్నారని పవన్ కళ్యాణ్ వ్యాఖ్యానించారు.
