చిత్తూరు నగరంలో దారుణ ఘటన వెలుగులోకి వచ్చింది. మతాంతర వివాహం చేసుకున్న యాస్మిన్బాను (26) తన తల్లిగారింట్లో అనుమానాస్పద స్థితిలో మృతి చెందింది. ఆదివారం ఉదయం భర్త సాయితేజ ఆమెను చిత్తూరులోని గాంధీ విగ్రహ కూడలి వద్ద సోదరుడి కారులో తల్లిగారింటికి పంపగా, గంటల వ్యవధిలోనే ఆమె మృతదేహం మార్చురీలో కనిపించింది. ఈ ఘటన సోమవారం సాయంత్రం వెలుగులోకి రాగా, హత్యా, ఆత్మహత్యా అనే అనుమానాలు స్థానికుల్లో చర్చనీయాంశమయ్యాయి.
“యాస్మిన్ను పుట్టింటి వారు ఆత్మహత్యగా చిత్రీకరిస్తున్నారు, కానీ నా భార్యను చంపేశారు,” అని సాయితేజ బోరున విలపిస్తూ ఆరోపించాడు.
బాలాజీనగర్కు చెందిన యాస్మిన్బాను, పూతలపట్టుకు చెందిన సాయితేజ కాలేజీ రోజుల్లో ప్రేమలో పడ్డారు. ఎంబీఏ చదివిన యాస్మిన్, బీటెక్ పూర్తి చేసిన సాయితేజ ఈ ఏడాది ఫిబ్రవరి 9న నెల్లూరులో ప్రేమ వివాహం చేసుకున్నారు. ఎస్సీ వర్గానికి చెందిన సాయితేజతో పెళ్లికి యాస్మిన్ తల్లిదండ్రులు వ్యతిరేకించడంతో, రక్షణ కోసం ఫిబ్రవరి 13న తిరుపతి డీఎస్పీని ఆశ్రయించారు. పోలీసులు కౌన్సెలింగ్ ఇచ్చినా, యాస్మిన్ కుటుంబీకులు తండ్రి అనారోగ్యంతో ఉన్నారని చెప్పి ఆమెను ఆదివారం ఇంటికి పిలిచారు. అయితే, ఆమె ఇంటికి చేరిన కాసేపటికే మృతి చెందినట్లు తెలిసింది. సాయితేజ వారి ఇంటికి వెళ్లి విచారించగా, యాస్మిన్ ఆత్మహత్య చేసుకుందని కుటుంబీకులు చెప్పారు. ఆమె తండ్రి షౌకత్అలీ, సోదరుడు లాలూ పరారయ్యారు. చిత్తూరు ఇన్ఛార్జి డీఎస్పీ ప్రభాకర్ కేసు నమోదు చేసి దర్యాప్తు చేస్తున్నారు.
