మనం రోజూ చూసే కొబ్బరికాయకు చాలా ప్రాముఖ్యత ఉంది. దీన్ని కేవలం ఒక పండుగానో, వస్తువుగానో కాకుండా, లక్షల మంది జీవితాలను ప్రభావితం చేసే వృక్షంగా గుర్తించాలి. ఈ ప్రాముఖ్యతను గుర్తు చేసుకుంటూ ప్రతి సంవత్సరం సెప్టెంబర్ 2న ప్రపంచ కొబ్బరి దినోత్సవం జరుపుకుంటారు. మరి ఈ ‘జీవన వృక్షం’ గురించి కొన్ని ఆసక్తికర విషయాలు తెలుసుకుందామా!
కొబ్బరి చెట్టులోని ప్రతి భాగం ఉపయోగపడుతుంది. కొబ్బరి చెట్టు కాండం ఇళ్ళు, పడవల నిర్మాణానికి వాడతారు. అలాగే కొబ్బరి పీచును గట్టి తాడు, వలలు, బ్రష్లు తయారు చేయడానికి ఉపయోగిస్తారు. కొబ్బరి చిప్పలు అలంకరణ వస్తువులకు, కొన్ని రకాల పాత్రలకు వాడతారు. కొబ్బరి పీచును ల్యాటెక్స్తో కలిపితే ఫర్నిచర్ కూడా తయారు చేయొచ్చు. అంతేకాదు, భూమి కోతను అరికట్టడానికి, మొక్కలు పెరగడానికి కూడా ఈ పీచు ఉపయోగపడుతుంది. కొబ్బరి చిప్పల నుంచి తయారు చేసే యాక్టివేటెడ్ కార్బన్ ఫిల్టర్లకు బాగా పనిచేస్తుంది. ఈ పీచుతో రగ్గులు, డోర్ మ్యాట్లు కూడా తయారు చేయొచ్చు. ఆశ్చర్యకరంగా, 1800ల్లో గిల్బర్ట్ దీవుల్లో సైనికులు కొబ్బరి పీచుతో చేసిన హెల్మెట్, ఆర్మర్ ధరించేవారు.
ఈ కొబ్బరి కాయ గురించి కొన్ని ఆసక్తికరమైన నిజాలు
- నిజానికి కొబ్బరి ఒక గింజ (డ్రూప్), ఇది మామిడి, జీడిపప్పు లాంటిదే. దీనిని పండుగానో, గింజగానో భావించకూడదు.
- కొబ్బరి కాయకు మూడు రంధ్రాలు ఉంటాయి. అవి ఒక మనిషి ముఖంలా కనిపిస్తాయి. అందుకే పోర్చుగీస్ భాషలో ‘ముఖం’ అని అర్థం వచ్చే ‘కోకో’ అనే పదం నుంచి దీనికి ‘కొబ్బరి’ అనే పేరు వచ్చింది.
- కొబ్బరి కాయ నీటిలో చాలా రోజుల వరకు తేలియాడగలదు. అలాగే చనిపోకుండా సుమారు 100 రోజులు సముద్రంలో ప్రయాణించి కొత్త చోట మొలకెత్తుతుంది. పాశ్చాత్య దేశాల్లో దీనిని ‘ట్రీ ఆఫ్ లైఫ్’ అని పిలుస్తారు.
- ఒక కొబ్బరి చెట్టు 100 సంవత్సరాల వరకు బతుకుతుంది. కానీ 80 సంవత్సరాల వరకే కొబ్బరికాయలు ఇస్తుంది. ఒకే కోతలో 30 నుంచి 70 కాయలు ఇస్తుంది.
- రెండో ప్రపంచ యుద్ధ సమయంలో డీహైడ్రేషన్ తగ్గించడానికి, సెలైన్ బదులుగా కొబ్బరి నీళ్లు వాడారు.
- కొబ్బరి పీచు, దాని పదార్థాలు ల్యాబ్ టెస్టుల్లో వైరస్, ఫంగస్, బ్యాక్టీరియా మీద బాగా పని చేస్తాయని పరిశోధకులు కనుగొన్నారు.
ప్రపంచంలో కొబ్బరి పంట.. మన వాటా ఎంత?
ప్రపంచంలో దాదాపు 80 దేశాల్లో 150 రకాల కొబ్బరి జాతులు ఉన్నాయి. ప్రపంచంలో అత్యధికంగా కొబ్బరి పండించే ఐదు దేశాలు: ఇండోనేషియా, ఫిలిప్పీన్స్, భారతదేశం, శ్రీలంక, బ్రెజిల్.
మన భారతదేశం కూడా ఈ విషయంలో చాలా ముందుంది. భారతదేశంలో ఎక్కువ కొబ్బరి పండించే ఐదు రాష్ట్రాలు: కర్ణాటక, తమిళనాడు, కేరళ, ఆంధ్రప్రదేశ్, పశ్చిమ బెంగాల్.
అంతర్జాతీయ కొబ్బరి సమాజం (ICC): ఈ సంస్థ 1969లో ఐక్యరాజ్యసమితి ఆధ్వర్యంలో మొదలైంది. కొబ్బరి పండించే చిన్న రైతులను ప్రోత్సహించడమే దీని ముఖ్య లక్ష్యం. ఇందులో ప్రస్తుతం 21 దేశాలు సభ్యులుగా ఉన్నాయి. ఈ దేశాలు ప్రపంచ కొబ్బరి ఉత్పత్తిలో 90 శాతానికి పైగా వాటాను కలిగి ఉన్నాయి.
