- విండోస్ 11 కంప్యూటర్లలో వాట్సాప్ వాడేవారికి ముఖ్యమైన అప్డేట్! ఇకపై ప్రత్యేకంగా యాప్ ఉండదు.
- వాట్సాప్ నేటివ్ యాప్కు బదులు, బ్రౌజర్లో వాడే ‘వాట్సాప్ వెబ్’ లాంటి వెర్షన్ రాబోతోంది.
- ఈ మార్పుతో అప్డేట్లు త్వరగా వస్తాయి, కానీ కంప్యూటర్ ర్యామ్ కాస్త ఎక్కువగా ఖర్చవ్వొచ్చు.
మీరు విండోస్ 11 కంప్యూటర్లో వాట్సాప్ యాప్ వాడుతున్నారా? అయితే, మీకో కీలకమైన మార్పు గురించి చెప్పాలి! వాట్సాప్ (WhatsApp), తన విండోస్ 11 కంప్యూటర్ల కోసం ఉన్న ప్రత్యేక యాప్ను తీసేసి, దాని బదులు వెబ్ ఆధారిత వెర్షన్ను తీసుకురాబోతోంది. ఈ మార్పును మెటా (Meta) సంస్థ దాదాపు ఖరారు చేసింది. దీనికి సంబంధించిన బీటా అప్డేట్ ఇప్పటికే వచ్చింది.
ఏం మారబోతోంది?
ఈ కొత్త మార్పుతో విండోస్ 11లో వాట్సాప్ కనిపించే విధానం పూర్తిగా మారిపోతుంది. ఇప్పుడు మీరు బ్రౌజర్లో వాడుతున్న వాట్సాప్ వెబ్ (WhatsApp Web) లాగే ఇది ఉంటుంది. మెటా కంపెనీ ఏమంటుందంటే, ఈ మార్పు వల్ల తక్కువ సమస్యలతో (బగ్స్), వేగంగా వాట్సాప్ను వాడొచ్చు. అలాగే, కొత్త కొత్త ఫీచర్లు కూడా చాలా త్వరగా యూజర్లకు అందుబాటులోకి వస్తాయి. విండోస్ యాప్ను ప్రత్యేకంగా నిర్వహించడానికి ఎక్కువ కష్టపడాల్సిన అవసరం ఉండదని మెటా భావిస్తోంది. మెటా ఈ నిర్ణయం తీసుకోవడానికి ప్రధాన కారణం, సాఫ్ట్వేర్ అభివృద్ధిని సులభతరం చేయడం. ఒకే వెర్షన్ను నిర్వహించడం వల్ల అన్ని ప్లాట్ఫామ్లలో (విండోస్, వెబ్) వాట్సాప్ను అప్డేట్ చేయడం సులభం అవుతుంది.
అయితే, ఈ మార్పుతో కొన్ని చిన్న ఇబ్బందులు కూడా ఉండొచ్చు. నిజానికి, విండోస్ కోసం ప్రత్యేక వాట్సాప్ యాప్ను తెచ్చింది, అది కంప్యూటర్లో తక్కువ ర్యామ్ వాడుకుంటూ వేగంగా పని చేయాలని. కానీ, ఇప్పుడు వెబ్ వెర్షన్ను వాడాలంటే, క్రోమ్ (Chrome), ఎడ్జ్ (Edge) లాంటి ఏదో ఒక బ్రౌజర్ కావాలి. దీనివల్ల కంప్యూటర్ ర్యామ్ కొంచెం ఎక్కువ ఖర్చయ్యే అవకాశం ఉంది. ప్రత్యేక యాప్కు అలవాటు పడిన వారికి ఈ మార్పు మొదట్లో కాస్త ఇబ్బందిగా అనిపించవచ్చు. కొత్తగా వచ్చిన ఈ వెర్షన్కు అలవాటు పడటానికి కొంత సమయం పట్టొచ్చు. అయితే, ఎప్పటినుంచో వాట్సాప్ వెబ్ వాడుతున్న వారికి మాత్రం ఈ కొత్త ఇంటర్ఫేస్ చాలా సుపరిచితంగా అనిపిస్తుంది. కొన్ని నివేదికల ప్రకారం, ఈ కొత్త వెబ్-ఆధారిత వెర్షన్ పాత యాప్ కంటే సుమారు 30% ఎక్కువ ర్యామ్ను ఉపయోగించవచ్చని తేలింది. మొత్తంగా, ఈ మార్పు వాట్సాప్ అప్డేట్లను వేగవంతం చేసినా, కంప్యూటర్ ర్యామ్ వినియోగం విషయంలో కొంతమందికి ఇది కొత్త అనుభవంగా మారొచ్చు.
