రోజులో ఏ ఒక్కపూటైనా టీవీ ఆన్ చేయకుండా అయినా ఉండొచ్చుగానీ. ఏ ఒక్క పూటైనా యూట్యూబ్ ని ట్యాప్ చేయకుండా ఉన్నారా? అబ్బే.. పూట దాకా ఎందుకు గంటకి ఓసారైనా యూట్యూబ్ ని ఓపెన్ చేయాల్సిందే.. కంటెంట్ చూడాల్సిందే అంటారా? అయితే, ఇకపై యూట్యూబ్ ని ఇలా కొత్తగా చూసేయండి. అందుకు ఓ ప్రత్యేక ‘ఎక్స్ టెన్షన్’ ని క్రోమ్ వెబ్ స్టోర్ నుంచి బ్రౌజర్ కి జత చేయవచ్చు. అదేంటంటే.. Enhancer for YouTube. దీన్ని యాడ్ చేసుకున్నాక యూట్యూబ్ ప్లేయర్ లో కొత్త ఆప్షన్లు కనిపిస్తాయి. వాటిని వాడుకుని డెస్క్ టాప్ పై మీ పనికి తగినట్టుగా ప్లేయర్ ని సెట్ చేసుకుని హ్యాపీగా వీడియోలు చూడొచ్చు. అదెలాగో కాస్త వివరంగా తెలుసుకుందాం.
ప్లేయర్ కిందే వరుసగా..
ఎక్స్ టెన్షన్ ని బ్రౌజర్ కి జత చేయగానే వరుసగా కంట్రోల్ బటన్స్ కనిపిస్తాయి. డీఫాల్ట్ గా ప్లేయర్ లో ఉండే వాటికి భిన్నంగా ఈ కంట్రోల్స్ పని చేస్తాయి. ఎలాగంటే.. ప్లే అవుతున్న వీడియో మాత్రమే కనిపించాలి. మిగావన్నీ కనిపించకుండా తెర మొత్తం చీకటైపోవాలంటే.. అందుకు ‘సినిమా మోడ్’ ఉంది. తెరంతా ఫుల్ స్క్రీన్ అయిపోకుండా.. ట్యాబ్ లోనే ఉండి.. తెర మొత్తం వీడియో ప్లే చేయాలంటే ‘ఎక్స్ ప్యాండ్’ చేసేకునే కంట్రోల్ ఉంది. తక్కువ సౌండ్ తో ప్లే అవుతున్న వీడియోల వాల్యూమ్ ని పెంచుకునే వెసులుబాటు కూడా ఉంది. అంతేకాదు.. వీడియోలో ఏదైనా ఫ్రేమ్ ని ఫొటో కొట్టాలన్నా ‘క్లిక్’మనిపించొచ్చు. ఇక చివరిగా.. మరో ఆప్షన్ ఉంది. అదే ‘పాప్ అప్ ప్లేయర్’. ఇది చాలా ప్రత్యేకం. ఎందుకంటే.. ఇప్పటి వరకూ మీరు వీడియోలను యూట్యూబ్ ట్యాబ్ లోనే ప్లే చేసి ఉంటారు. అలాకాకుండా.. ప్లే అవుతున్న వీడియోని బయటికి లాగేసి.. తెరపై మీకు కావాల్సిన చోట పెట్టకుని ప్లే చేసుకుంటే? చాలా సుఖంగా అనిపిస్తుంది కదా.. డెస్క్ టాప్ పై పని ఓ పక్కా.. ప్లేయర్ మరో పక్కా.. సెట్ అయిపోతుంది. ప్లేబ్యాక్ వీడియో క్వాలిటీని కూడా డిఫాల్ట్ గా సెట్ చేయొచ్చు. మరిన్ని భిన్నమైన ఆప్షన్లు ఉన్నాయి. ఏక్ బార్ ట్రై కరో!! https://rb.gy/ciqf4u లింక్ లోకి వెళ్లి బ్రౌజర్ కి జత చేయండి.
