- ఎమ్మెల్యేలకు సౌకర్యవంతమైన నిద్ర కోసం 15 రిక్లైనర్ కుర్చీలు.
- సభకు హాజరయ్యే ఎమ్మెల్యేల సంఖ్య పెంచడమే లక్ష్యం.
కర్ణాటక అసెంబ్లీ స్పీకర్ యు.టి. ఖాదర్ ఎమ్మెల్యేలకు సౌకర్యవంతమైన నిద్ర సౌకర్యం కల్పించాలని నిర్ణయించారు. బడ్జెట్ సమావేశాల్లో పాల్గొనే ఎమ్మెల్యేలు మధ్యాహ్నం భోజనం తర్వాత కునుకు తీసేందుకు 15 రిక్లైనర్ కుర్చీలు అందుబాటులో ఉంచుతున్నారు. సభకు ఎమ్మెల్యేల హాజరును పెంచడమే ఈ సౌకర్యం కల్పించడానికి ప్రధాన కారణమని స్పీకర్ ఖాదర్ తెలిపారు. ఎమ్మెల్యేలు సకాలంలో సభకు హాజరై, ప్రతిరోజూ సెషన్ ముగిసే వరకు అందుబాటులో ఉండాలని సూచించారు.
అసెంబ్లీలోనే భోజనం
ఎమ్మెల్యేల కోసం ఇప్పటికే కర్ణాటక అసెంబ్లీలో ఉదయం 9 గంటలకు అల్పాహారం, మధ్యాహ్నం భోజనాన్ని ఉచితంగా అందిస్తున్నారు. ఎమ్మెల్యేలు భోజనం కోసం బయటకు వెళ్ళి, తిరిగి ఆలస్యంగా రావటం వల్ల సభ సమయం వృధా అవుతుందని స్పీకర్ భావిస్తున్నారు. అందుకే, అసెంబ్లీలోనే భోజనం అందిస్తున్నారు. గతంలో కూడా ప్రయోగాత్మకంగా రిక్లైనర్ కుర్చీలు ఉపయోగించారు. ఎమ్మెల్యేల నుండి మంచి ఫీడ్బ్యాక్ రావడంతో, ఇప్పుడు వాటి సంఖ్యను పెంచారు. ఈ సౌకర్యం వల్ల ఎమ్మెల్యేల హాజరు, పనితీరు మెరుగుపడుతుందని స్పీకర్ ఆశిస్తున్నారు.
