ఆంధ్రప్రదేశ్ మాజీ ఇంటెలిజెన్స్ చీఫ్, ఐపీఎస్ అధికారి పీఎస్ఆర్ ఆంజనేయులు ముంబై నటి కడంబరి జత్వానీ వేధింపుల కేసులో అరెస్టయ్యారు. ఏప్రిల్ 22, 2025న హైదరాబాద్లో ఏపీ సీఐడీ అధికారులు ఆయనను అదుపులోకి తీసుకుని విజయవాడకు తరలిస్తున్నారు. వైఎస్ఆర్సీపీ హయాంలో ఇంటెలిజెన్స్ చీఫ్గా పనిచేసిన ఆంజనేయులు, మాజీ సీఎం వైఎస్ జగన్మోహన్ రెడ్డికి అత్యంత విధేయుడిగా వ్యవహరించారు. ప్రస్తుతం సస్పెన్షన్లో ఉన్న ఆయనపై జత్వానీ ఫిర్యాదు ఆధారంగా కేసు నమోదైంది. ఈ కేసులో ఆయన రెండో నిందితుడిగా ఉండగా, వైఎస్ఆర్సీపీ నేత కుక్కల విద్యాసాగర్తో కుమ్మక్కై జత్వానీని వేధించినట్లు ఆరోపణలు ఉన్నాయి.
“జత్వానీపై తప్పుడు ఫిర్యాదు చేయించి, ఆమెను, ఆమె తల్లిదండ్రులను అరెస్ట్ చేయించారు. ఈ కుట్రలో ఆంజనేయులు కీలక పాత్ర పోషించారు,” అని సీఐడీ వర్గాలు తెలిపాయి.
ఈ కేసులో విజయవాడ మాజీ సీపీ కాంతిరాణా తాతా, ఐపీఎస్ అధికారి విశాల్ గున్నీ ఇప్పటికే సస్పెండ్ అయ్యారు. 2024 ఫిబ్రవరిలో వైఎస్ఆర్సీపీ నేత విద్యాసాగర్ ఫిర్యాదు మేరకు జత్వానీ, ఆమె తల్లిదండ్రులపై ఇబ్రహీంపట్నం పోలీస్ స్టేషన్లో కేసు నమోదైంది. విద్యాసాగర్, జత్వానీ తన ఆస్తిపై తప్పుడు ఒప్పందాలు చేసి రూ.5 లక్షలు దోచుకుందని ఆరోపించాడు. ఈ ఫిర్యాదును ఆంజనేయులు ప్రణాళికాబద్ధంగా రూపొందించి, కాంతిరాణా, విశాల్ గున్నీలతో కలిసి ముంబైలో జత్వానీని అరెస్ట్ చేయించారు. కూటమి ప్రభుత్వం అధికారంలోకి వచ్చిన తర్వాత, జత్వానీ తనపై తప్పుడు కేసు నమోదు చేసి వేధించారని ఫిర్యాదు చేయడంతో, విద్యాసాగర్తో పాటు ఈ ముగ్గురు ఐపీఎస్ అధికారులపై కేసు నమోదైంది. సీఐడీ ఈ కేసును పూర్తిస్థాయిలో విచారించనుంది.
