- మద్యం కుంభకోణం కేసులో అరెస్టైన వైకాపా ఎంపీ మిథున్రెడ్డికి జైలులో ప్రత్యేక వసతులు కల్పించేందుకు విజయవాడ ఏసీబీ కోర్టు అనుమతిచ్చింది.
- బెడ్, దుప్పటి, దిండు, వాటర్ బాటిల్స్, కూలర్, పేపర్-పెన్, టేబుల్ వంటివి వాడుకోవచ్చు.
- టీవీ కూడా అనుమతించారు, అయితే బయట నుంచి ఆహారం తెచ్చుకోవాలంటే అండర్టేకింగ్ లెటర్ ఇవ్వాలి.
వైఎస్సార్ కాంగ్రెస్ పార్టీ (వైకాపా) ఎంపీ మిథున్రెడ్డికి ఊరట లభించింది. మద్యం కుంభకోణం కేసులో అరెస్టై జైలులో ఉన్న మిథున్రెడ్డి, తనకు ప్రత్యేక వసతులు కల్పించాలని కోరుతూ విజయవాడలోని ఏసీబీ కోర్టులో పిటిషన్ దాఖలు చేశారు. ఈ పిటిషన్పై విచారణ జరిపిన కోర్టు, మిథున్రెడ్డికి జైలులో కొన్ని ప్రత్యేక సదుపాయాలు కల్పించడానికి అనుమతిస్తూ ఆదేశాలు జారీ చేసింది. కోర్టు ఆదేశాల ప్రకారం, మిథున్రెడ్డికి జైలులో మంచం, దుప్పటి, దిండు, వాటర్ బాటిల్స్, కూలర్, పేపర్-పెన్ను, టేబుల్ వంటివి అందించాలి. అలాగే, అవసరమైతే టీవీ కూడా ఏర్పాటు చేయవచ్చు అని కోర్టు పేర్కొంది. అయితే, పేపర్, వాటర్ బాటిల్స్, ఆహారం వంటి వాటికి అయ్యే ఖర్చును మిథున్రెడ్డినే భరించాలని న్యాయస్థానం స్పష్టం చేసింది.
బయటి ఆహారానికి షరతు..
జైలు బయటి నుంచి ఆహారం తీసుకురావాలనుకుంటే, అందుకు అండర్టేకింగ్ లెటర్ (పూచీకత్తు పత్రం) ఇవ్వాలని కోర్టు ఆదేశించింది. మిథున్రెడ్డికి జైలులోనే వైద్య సదుపాయాలు కల్పించాలని, ఒకవేళ అవసరమైతే జైలు బయట కూడా వైద్య చికిత్స అందించాలని న్యాయస్థానం సూచించింది. మిథున్రెడ్డిని కలుసుకోవడానికి న్యాయవాదులకు వారంలో మూడుసార్లు, బంధువులకు వారంలో రెండుసార్లు కోర్టు అనుమతి ఇచ్చింది. ఈ తీర్పుతో మిథున్రెడ్డికి జైలు జీవితంలో కొంత ఉపశమనం లభించినట్లైంది.
